En 1755, o padre Sarmiento, escritor e monxe beneditino, describe esta ruta dende Xuvia (Narón), Valdoviño e ata Santo André. Desde entón, milleiros de peregrinos percorreron os seus pasos ata chegar ao Santuario de Santo André de Teixido, no concello de Cedeira. O Camiño Vello a Santo André comeza no Mosteiro de San Martiño de Xuvia, en Narón, e ao longo dos seus 40 km, pasa por lugares de interese como o muíño das Aceas, o Pazo de Libunca, o monte dos Nenos; o fito de Portonovo de Valverde; e a ponte medieval de Porto do Cabo. Despois, atravesa a serra da Capelada cara ao Santuario de Santo André de Teixido. Unha vez alí, un bo peregrino debe beber auga dos tres picos da fonte e pedir un desexo. Para saber se o santo o concederá, basta con botar unha migalla de pan na fonte. Se flota, o desexo será concedido; se afunde, o santo non llo concederá.